बैशाखमा फिल्मको लहर, एक दिनको फरकमा दुई फिल्मको ट्रेलर रिलिज


Filmy Kura, Mar 20, 2016 at 5:19 pm

वर्ष २०७२ नेपाली फिल्मका लागि विनाशकारी भूकम्प र नाकाबन्दीका बाबजुद पनि राम्रै रह्यो । किनकी यस पटक अभाव र समस्यकाबीच पनि नेपाली फिल्मलाई दर्शकले समय र पैसा दुवै खर्च गरे । चैतको अन्तिम साता फिल्मीकुराले यो वर्ष नेपाली सिनेमा जगतका लागि कस्तो रह्यो विस्तृत रुपमा समिक्षा गर्ने नै छ तर हामी यो वर्ष छोडेर आउँदै गरेको २०७३ सालको कुरा गर्दैछौ ।

rolpa-junge

नयाँ वर्ष नयाँ सोच अनि हरेकमा उमङ्ग यस सँगै नेपाली फिल्मका लागि ०७३ राम्रो होला भन्ने आशा त छदैनी छ । बैशाख महिनामा फिल्मको एक खालको लहर देखा परिसकेको छ । चैत्र २६ गते रिलिज लिस्टमा रहेका ‘रामप्यारी’ र ‘नाई नभन्नु ल ४’ पछि बैशाखको पहिलो प्रदर्शन हुने फिल्ममा अहिले ‘हाउ फन्नी’ देखिएको छ । शुक्रबारीय रिलिज अन्तर्गत बैशाखको पहिलो हप्ता अहिले सम्म कुनै फिल्म रिलिज हुने संकेत नदेखिए पनि बैशाख १० बाट भने ‘हाउ फन्नी’ ले विधिवत् रुपमा २०७३ लाई अगाडि बढाउने देखिन्छ ।

यस पछि बैशाख १७ गते भने दुई फिल्म लाग्दैछन् । दुवै फिल्म इतिहास सम्झाउने खालका छन् । आज आइतबार राजधानीमा एक कार्यक्रमका बीच ‘जंगे’ को ट्रेलर रिलिज गरिएको छ । विशेषगरी राणाकालिन समयमा शासन सत्ता सम्हालेका प्रधानमन्त्री जङ्गबहादुर राणाको जीवनीमा आधारित फिल्मले इतिहासको विरता र गाथा मात्र हैन हाल नेपाली समाजमा जङ्गबहादुर भइदिएको भए कस्तो हुन्थ्यो होला सो कुराको समेत चित्रण गर्नेछ । वास्तवमा रियल पात्र प्रवृत्तिमा केन्द्रित भन्दा पनि फिल्मलाई कमर्सियल बनाउन वर्तमान समाजमा जंगेको रुप कस्तो हुन सक्थ्यो भन्ने कल्पना गरिएको फिल्म निर्माण यूनिटले बताएको छ । सार्वजनिक ट्रेलरमा एक्शन पार्टलाई निकै प्राथमिकता दिइएको छ । ‘जंगे’ को रोलमा मिडिया पर्सन समेत रहेका अभिनेता सुरज सिंह ठकुरीले अभिनय गरेका छन् । सुरजले फिल्म सुटिङ ताका जंगेकै जस्तो रुप धारण गरेर केही द्धन्द्धका दृश्य छायांकन गर्दा हात गोडा भाचिएको घटना समेत स्मरण गरे ।

फिल्ममा डिफरन्ट क्यारेक्टर गर्न रुचाउने कलाकार ऋचा शर्माको समेत यसमा प्रमुख भूमिका रहेको छ । फिल्मीकुरा सँगको भेटमा उनले ‘को आफ्नो’ ले छाड्न नसकेको छाप ‘जंगे’ मा निभाएको पात्रले पुरा गर्ने विश्वास व्यक्त गरिन् । फिल्मका निर्देशक उत्कल थापा हाल अष्ट्रेलियामा छन् । उनले पनि फिल्म मेकिङ पाटो राम्रो भएको र यो फिल्म मनोरञ्जनको खुराक बनेको सन्देश छाडेका थिए जुन सन्देश सञ्चारकर्मी माझ आज प्ले गरिएको थियो । सुरज, ऋचाको अलवा फिल्ममा नरेश पौड्याल, अनुप बराल र शिखा शाहीको समेत अभिनय हेर्न सकिन्छ । ‘जंगे’ का निर्माता सुशन प्रजापति हुन् ।

यस्तै सोही डेटमा लाग्ने अर्को फिल्म ‘रोल्पा रोग’ को पनि हिजो शनिबार एक कार्यक्रमकाबीच ट्रेलर र गीत सार्वजनिक गरिएको छ । दीपक ओली निर्देशित फिल्मले पनि केही इतिहासका सत्य पाटालाई आत्मसाथ गरेको छ । विशेषगरीकन दश वर्षे सशस्त्र युद्धताका रोल्पा जिल्ला कसरी युद्धभूमिमा परिणत भयो ती वास्तविक खोतल्ने प्रयास फिल्मले गरेको छ । सो समयमा युवाले भोग्नुपरेको कठिनाईको चित्रण फिल्मले गर्नेछ ।

फिल्ममा अधिकांश नयाँ अनुहारको अभिनय रहेको छ । सञ्चार क्षेत्रमा लागेर हिरो हुने सपना पालेका शिशीर भण्डारीको पनि अभिनय हेर्न सकिन्छ ‘रोल्पा रोग’ मा । निर्मला वली प्रस्तुतकर्ता रहेको फिल्मले बैशाख १७ लाई रोग फैलने मिति भनेको छ । सो मितिमा दर्शक रोगी बन्न हल धाउलान् त ? यसै भन्न सकिन्न तर नयाँ वर्षको संघारमा फिल्मको लहर भने भटाभट देखिन थालेको छ ।


Leave a Reply

Your email address will not be published. Required fields are marked *

Related News

अनमोलको आठौं फिल्म एन्टी हिरो, २०२० मा रिलिज हुने
कबड्डी कबड्डी कबड्डीको शीर्ष गीत रिलिज, पन्चेबाजाको मिश्रणमा जोडियो र्‍याप
साइनोलाई मिल्दै दर्शक साथ, कस्तो गर्दैछ त व्यापार ?
चलचित्र हजार जुनीसम्मको टाइटल सङ रिलिज, आयुषको स्वरमा गीत बन्यो यस्तो (भिडियो)